پەیامێکی تر بۆ دایک باوکە خۆویستەکان

بانگەوازێک بۆ دایک و باوکانی خۆشەویست، ئەگەر دەتەوێت سەری منداڵەکانت لەقوڕ بنێی و لەدەستیان بێزاری و دەتەوێت دەگەیەکی کەمەرشکێنیان لێبدەی، دوای ١٢ ساڵ رەنج بەخەساریان بکەی؛ تکایە، تکایە، تکایە بیانێرنە ئەو بەشە ئەکادیمیانەی خوارەوە:

١- سەرجەم بەشەکانی کۆلیژی/فاکەڵتی ئاداب/پەروەردەی جوگرافیا بەو شێوە و پرۆگرامەی ئێستا؛

٢ - سەرجەم بەشەکانی کۆلیژی/فاکەڵتی ئاداب/پەروەردەی مێژوو و شوێنەوار بەو شێوە و پرۆگرامەی ئێستا؛

٣- سەرجەم بەشەکانی کۆلیژی/فاکەڵتی ئاداب/پەروەردەی زمانی کوردی بەو شێوەی ئیستا؛

٤- سەرجەم بەشەکانی کۆلیژی/فاکەڵتی ئاداب/پەروەردەی زمانی عەرەبی بەو شێوەی ئیستا؛

٥- سەرجەم بەشەکانی کۆلیژی/فاکەڵتی ئاداب/پەروەردەی شەریعە و ئاینی بەو شێوەی ئێستا؛

٦- سەرجەم بەشەکانی کۆلیژی/فاکەڵتی زانستە مرۆڤایەتیەکان کارگێڕی و ئابوری و..هتد بەو فاڵطۆخانەی ئێستا؛

٧- سەرجەم بەشەکانی کۆلیژی/فاکەڵتی پەروەردەی وەرزش بەو پرۆگرامە و زۆروبۆری و بەرێوەبردنەی ئێستا؛

٨- سەرجەم بەشەکانی کۆلیژی/فاکەڵتی زانست بەشەکانی جیۆلۆجی و ژینگە بەو پرۆگرامە و زۆروبۆری و بەرێوەبردنەی ئێستا؛

٩- سەرجەم بەشەکانی کۆلیژی/فاکەڵتی زانست بەشەکانی بایۆلۆجی/فیزیا/مێدیکەڵ مایکرۆبایۆلۆجی بەو پرۆگرامە و زۆروبۆری و بەرێوەبردنەی ئێستا؛

١٠- سەرجەم بەشەکانی کۆلیژی/فاکەڵتی ئەندازیاری بەشەکانی نەوت و بەنداو و تەلارسازی و ڕووپێوی و کیمیاوی بەو پرۆگرامە و زۆروبۆری و بەرێوەبردنەی ئێستا؛

١١- سەرجەم بەشەکانی کۆلیژی/فاکەڵتی؛ دەرمانسازی و تاقیگەی پزیشکی و ددانسازی بەو پرۆگرامە و زۆروبۆری و بەرێوەبردنەی ئێستا؛

١٢- سەرجەم بەشەکانی کۆلیژی/فاکەڵتی؛ کشتوکاڵ وەک بەشەکانی به‌روبوومی كێڵگه‌یی, دارستان, خاك و ئاو, پاراستنی ڕووه‌ک بەو پرۆگرامە و زۆروبۆری و بەرێوەبردنەی ئێستا؛

١٣- سەرجەم بەشەکانی کۆلیژی/فاکەڵتی یاسا بەو پرۆگرامە و زۆروبۆری و بەرێوەبردنەی ئێستا.

تکاتان لێدەکەم، نەکەن لە دەرچوەکانیان بپرسن! نەکەن لە ژێرخان و پرۆگرام و بەڕێوەبردنی ئێستایان بپرسن! خۆتان لەخەتی گێلی بدەن!

تکاشتان لێدەکەم فێری هیچ پیشەیەکی تەکنیکیان مەکەن! مەهێلن بزمارێک لەدیوار بچەقێنن! مەهێلن بەشداری لەیەک خولی ڕاهێنان بکەن! چاولیکەریۆکەی بکەن بۆخۆتان! چۆن دەبی کچی/کوڕی فلانی ناسیاوتان ئەندازیار بێت و هی ئێوەش تەکنیکیەکی فاشل؟ پارە و بژێوی ژیان چیە؟!!چڵکی دەستە!! ١٠ ساڵ لەماڵەوە دابنیشن بێ مووچە و بێکار، زۆر خۆشترە لەوەی یەک خولەک بێگانەیەک پێت بڵێت کچەکەت/کوڕەکەت دەرچوو نیە!!